Бөлүмдөр
Жекшемби, 17-февраль
Баракелде, Бишкек 07.02.2019 13:27 Жаңыланды: 07.02.2019 13:59 На русском

Аскарбек Шадиевдин 1,8 млрд сомдук мүлкү мамлекетке берилди. Тизме

Аскарбек Шадиев
Аскарбек Шадиев

Turmush -  Бүгүн, 7-февралда Кыргызстандын Коопсуздук кеңешинин катчысы Дамир Сагынбаев Бишкекте маалымат жыйын уюштурду. Анын алкагында мурунку биринчи вице-премьер-министр Аскарбек Шадиевге козголгон кылмыш иш тууралуу да айтты.

«Тергөөнүн жүрүшүндө Шадиевге кызмат абалынан кыянаттык менен пайдалануу, мамлекеттик чек арадан мыйзамсыз өтүү жана ири көлөмдөгү кылмыштуу кирешелерди мыйзамдаштыруу фактысы боюнча айып тагылды. Тергөө иштери өз убагында бүткөрүлүп, материалдар сотко берилген. Эсиңиздерде болсо эпизоддордун бири менен Жогорку Кеңештин аппаратынын мурунку бөлүм башчысы Закиров 6 жылга эркинен ажыратылды», - деди катчы.

Анын айтымында, Шадиевдин конфикацияланган мүлкү мамлекетке берилген.

«Шадиев сыртынан 10 жылга эркинен ажыратылып, мүлкү конфискацияланган. Анын бардык мүлкү убагында камакка алынып, учурда конфискацияланган 1 млрд 852 млн сомдук мүлкү мамлекетке өткөрүлүп берилген», - деп кошумчалады Дамир Сагынбаев.

---------------------------------------------------------------------------------------------------------

Бишкектин Биринчи май райондук соту 2018-жылдын 25-декабрында мурунку вице-премьер-министр Аскарбек Шадиевге карата өкүм чыгарган. Анда 10 жылга эркинен ажыратылып, үй-мүлкүн конфискациялоо менен жазаны күчөтүлгөн режимде өтөө чечими тууралуу айтылат. Ал эми мындай өкүм сыртынан угузулду.

АКИpress агенттиги А.Шадиев менен анын жакындарынын соттун өкүмү менен конфискациялана турган мүлкүн жарыялаган.

Тизме:

- «Карвен четыре сезона», уставдык капиталдан 33,33%;

- «Аква Инвест Плюс», уставдык капиталдан 50%;

- «Карвен Групп», уставдык капиталдан 50%;

- «Ала-Арча» комплексиндеги жеке турак үй (№14), Аламүдүндөгү Орто-Сай айылы;

- «Ала-Арча» комплексиндеги жеке турак үй (№19);

- Бишкектин Манас проспектисиндеги 11/1 даректеги кеңсе;

- «Тойота Лэндкрузер 150» унаасы;

- Коммерциялык банктардагы А.Шадиевге тиешелүү 5954 доллар (404 миң 872 сом);

- Коммерциялык банктардагы А.Шадиевдин жубайы Асел Шадиевага тиешелүү 57 069 доллар (3 млн 880 миң 692 сом) жана 290 миң 535,99 сом;

- «Трейд Инвест» («Ала-Арча» соода оюн-зоок борбору), уставдык капиталдан 100%;

- «Ларель», уставдык капиталдан 50%.

Конфискацияланган мүлктүн жалпы суммасы – 1 млрд 852 млн 236 миң сом.

---------------------------------------------------------------------------------------------------------

Аскарбек Шадиевдин депутаттык укуктары мөөнөтүнөн мурда 2018-жылы 2-ноябрда токтотулган. Буга чейин А.Шадиевге бир нече кылмыш иши козголуп, кийинчерээк ага издөө жарыяланган болчу.

Окуя тууралуу

Аскарбек Шадиевге мамлекеттик чек араны мыйзамсыз кесип өтүү фактысы боюнча кылмыш иш козголуп, тергөө иштери жүрүп жатканын УКМКнын басма сөз кызматы 2018-жылдын 28-июнунда кабарлаган.

Ишти 25-июнда Башкы прокуратура Кылмыш-жаза кодексинин 346-беренесинде (мамлекеттик чек араны мыйзамсыз кесип өтүү) каралган белгилер боюнча козгогон.

2018-жылы 31-майда А.Шадиевди УКМКнын камагына алуу боюнча соттун өкүмү чыккан. Ага карата кызмат абалынан кыянаттык менен пайдалануу беренеси боюнча айып коюлуп, 28-апрелде кылмыш иш козголгон болчу. Бирок ал 27-апрель күнү Баткен облусунун Исфана шаарындагы тууганы каза болгондугуна байланыштуу ошол жакка кетип, андан кийин Лейлек районунун Арка айылындагы чек аранын көзөмөлгө алынбаган тилкеси аркылуу Тажикстанга өтүп кеткени маалымдалган. 28-апрель күнү Кыргызстандын дипломатиялык паспортун колдонуп, саат 18:20да Худжант—Москва каттамы менен учуп, андан ары АКШнын Нью-Йорк шаарына кетип калган.
Кылмыш иш КРнын Кылмыш-жаза кодексинин 304-беренеси (кызмат абалынан кыянаттык менен пайдалануу) менен козголгон.

«2017-жылдын 29-июнунда Жогорку Кеңештин төрагасынын наамына КМШнын Парламент аралык ассамблеясынын иш-чаралары боюнча график жөнөтүлгөн. Ал документ ошол кездеги парламенттин Эл аралык иштер боюнча комитетинин төрагасы Аскарбек Шадиевге таанышуу үчүн берилген. Иш-чаралардын графиги түзүлгөн документте Чыңгыз Айтматов атындагы сыйлык тапшыруу жөнүндө маалымат болгон эмес. Бирок 2017-жылдын 25-августунда Чыңгыз Айтматов атындагы сыйлык ал жылы берилбей турганын билип туруп, А.Шадиев парламенттин төрагасына сыйлык үчүн 30 миң долларды бөлүү боюнча кайрылуу жөнөткөн. Ошол эле жылдын 15-сентябрында кайрылуунун жыйынтыгы менен аталган сумма Жогорку Кеңештин эл аралык иштер, коргоо жана коопсуздук боюнча бөлүмүнүн башчысы Арсен Закиров аркылуу бөлүнгөн. Бирок КМШнын Парламент аралык ассамблеясына каражат түшкөн эмес. Анын кесепетинен мамлекеттик казынага 2 млн 61 миң сом зыян келтирген», - деп айтылган УКМКнын маалыматында.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×