Бөлүмдөр
Жума, 16-ноябрь
Баракелде, Бишкек 06.06.2018 16:48 На русском

А.Атамбаевдин С.Исаков менен К.Кулматовдун кармалышы боюнча саясий билдирүүсү

Turmush -  Мурунку президент, КСДПнын төрагасы Алмазбек Атамбаевдин Сапар Исаков менен Кубанычбек Кулматовдун камакка алынышы боюнча расмий билдирүүсүн партиянын басма өз кызматы бүгүн, 6-июнда таратты.

Саясий билдирүүнүн тексти өзгөртүүсүз берилет:

«КРнын мурдакы Премьер-министри, СДПКнын төрагасынын орун басары Сапар Исаковду жана Мамлекеттик Бажы кызматынын мурдакы төрагасы, биздин партиянын Саясий кеңешинин мүчөсү Кубанычбек Кулматовду камакка алуу туурасындагы кечээки чечим – бул коррупция менен күрөшүү эмес. Коррупция менен күрөштө айырмаланган так ушул адамдардын коррупцияга күнөөлөнүп камакка алынышы кадыресе акыл-эске сыйбайт. С.Ж.Исаковдун Өкмөтү ушул жылдын 4 айынын ичинде бюджеттин киреше бөлүгүнүн чыгаша бөлүгүнөн 5 миллиард сомго жогорулашын (профицит) камсыз кылды. Мындай көрсөткүчкө эгемендүү Кыргызстандын тарыхында алгачкы жолу жетишилди. Мында Исаков С.Ж. менен Кулматов К.К. коррупционерлерден тазалай баштаган бажы органдарынан түшкөн төлөмдөр негизги ролду ойноду.

Бажыдагы уурулуктун масштабдарын ачып көрсөткөн мамлекеттик ишмерлерди камакка алуу туурасындагы кечээки чечим, бул иш жүзүндө бажы кызматынын көмүскөй кардиналы аты белгилүү “Раим-миллиондун” бийликтеги достору, колдоочулары тарабынан болуп жаткан өч алуу. Ошондой эле Президенттин Аппаратынын мурдакы бөлүм башчысы С.Ж.Исаков да, Бишкектин мэри болуп турган К.К.Кулматов да тергөө тарабынан коюлуп жаткан айыптоолордун негизин түзгөн чечимдерди өз алдынча кабыл алууга ыйгарым укуктары болбогонун расмий түрдө билдирем. Укук коргоо органдарына иштин маңызын өз алдынча териштирип алууга мүмкүнчүлүк бериш үчүн мен ушул убакка чейин ачык билдирүүлөрдү жасоодон карманып келдим. Бирок мен бүгүн аларга С.Ж.Исаковду жана К.К.Кулматовду эптеп бир шылтоо таап, камоо милдети коюлганын көрүп турам. ЖЭБди Кытайдын кредитинин эсебинен реконструкциялоо, анын ичинде подрядчикти кытай тараптын тандоосуна макулдук берүү, жана ошондой эле гранттык каражаттарды Калыс Ордо конушундагы мектептин курулушуна багыттоо жөнүндөгү чечимдер тийиштүү мамлекеттик органдардын жетекчилери менен ар тараптуу талкуулангандан кийин мамлекет башчысы Атамбаев А.Ш. жана өлкөнүн Өкмөтү тарабынан кабыл алынган. Мындай чечимдерди кабыл алууда өлкө президентинин негизги ролу, мамлекеттик органдардын жана мамалекеттик кызматкерлердин жоопкерчилигинин таңкыстыгы, мамлекет башчысынын тышкы саясаттагы милдеттери, ошондой эле туруктуу өнүгүүнүн Улуттук стратегиясынын талаптарын ишке ашыруу менен шартталган. Максаты Кыргыз Республикасынын мамлекеттик көз карандысыздыгын жана эгемендүүлүгүн чыңдоо болуп эсептелген башка улуттук долбоорлор жөнүндө да ушуну айтса болот.

Анын ичинде: “Датка-Кемин” ЭЛЧ, “Датка” жана “Кемин” көмөкчү чордондорунун курулушу, “Түндүк-Түштүк” альтернативалык жолунун курулушу, “Кыргызгаздын” инфраструктурасын “Газпром” компаниясына өткөрүп берүү, ГЭСтердин Жогорку-Нарын каскадын курулушу, Токтогул жана Ат-Башы ГЭСтерин реконструкциялоо, Бүткүл дүйнөлүк көчмөндөр оюндарына карата объектилердин курулушу, 1916-жылдагы окуялардын 100 жылдыгына карата масштабдуу иш-чараларды өткөрүү, Тарых музейин реконструкциялоо жана башка көптөгөн стратегиялык объектилер жана иш-чаралар бар. КСДПнын активдүү башка мүчөлөрүн, анын ичинде Жалал-Абад шаарынын экс-мэри С.А.Авазовду жана Жогорку Кеңештин депутаты О.М.Артыкбаевди куугунтукка алууну да негизсиз деп эсептейм. Коррупция менен күрөшүү деген кыйкырыктардын астында иш жүзүндө, өз пикири, өз позициясы барларга аңчылык башталды.

Буга далил болуп, мисалы, өткөн 2017-жылдагы коррупция менен күрөшүүнүн алкагында, эч кандай куру кыйкырыгы жок эле бюджетке 9 миллиард сом кайтарылган болсо, ал эми бул жылдын көрсөткүчтөрү азырынча алда канча төмөн. Жоопко Сапар Исаковду эмес, эгерде тергөөнүн жүрүшүндө тийиштүү фактылар аныкталса, ЖЭБдин эски бөлүгүндөгү аварияга жол берип, Бишкектин тургундарын тоңдурган күнөөкөрлөрдү, материалдарды, жабдууларды жогорулатылган баалар менен сатып алгандарды тартыш керек. КККнын учурдагы директору сыяктуу элпек достору өлкө президенти С.Ш.Жээнбековду опуртал жолго түртүп жатышат. Мен ага өзүнө мурун эскерткен элем, а ушул жылдын мартында дагы бир жолу өзүмдүн маалымат жыйынымда айтканга аргасыз болдум. Апрель ыңкылабынан кийин Кыргызстандын Социал-демократиялык партиясы өлкөдө стабилдүүлүктү орнотууга жана Кыргызстандын туруктуу өнүгүү жолуна түшүүсүнө ири салымын кошту. Биз тынчылыкты жана элибиздин биримдигин ар тараптуу коргоого милдеттүүбүз. Мунун кепилдиги — адилет бийлик. Бул дайыма эсибизде болууга тийиш. КСДП иш-аракеттерин мыйзам жана КРнын Конституциясынын алкагында гана жүргүзөт, мыйзамдуулукту талап кылат, жарандардын, партия мүчөлөрүнүн укуктарын жана мыйзамдуу кызыкчылыктарын коргойт. Ошол эле маалда урматтуу мекендештер, чагымчылдыкка жол бербөө үчүн мен сиздерди укуксуз ыкмаларга барбоого чакырам. Кыргыз эли жогоруда көрсөтүлгөн кылмыш иштеринин козголушунун чын себептерин эртедир-кечтир билет жана өз калыс баасын берет».

-----------------------------------------------------------------------------------------------------

Мурунку премьер-министр Сапар Исаков кечээ, 5-июнда 2 айга камакка алынды. Ал саат 16:00дө УКМКнын имаратына кайрадан сурак берүү үчүн кирип кеткен болчу.

УКМКнын тергөөчүсү С.Исаковго карата кабыл алынган баш коргоо чарасын өзгөртүүнү сунуштап, Биринчи май райондук соту 2 айга УКМКнын абагына камакка алуу чечимин чыгарган.

29-майда мурунку премьер-министр Сапар Исаковго КРнын Кылмыш-жаза кодексиндеги 303-берененин 1-бөлүмү (коррупция) боюнча айып тагылган. Буга чейин Бишкек ЖЭБди модернизациялоодогу коррупция фактысы боюнча кылмыш иш козголгон болчу. Андан кийин С.Исаковго карата сыртка чыкпоо чарасы кабыл алынган.

УКМКнын маалыматында: «С.Исаков 2013-жылы Президенттик аппараттын жетекчисинин рангындагы тышкы саясат бөлүмүнүн башчысы кызматын аркалап турганда «Бишкек ЖЭБди модернизациялоо» долбоорунун алкагында саясий абалынан пайдаланып, мурда келишип алган тарапташтары менен бирге чет элдик компаниянын кызыкчылыгын коргогон. Бөдрөтчүнү (подрядчик) тандоодогу мындай аракеттин кесепетинен мамлекетке ири өлчөмдө зыян келтирилген. Учурда тергөө иштери улантылып жатат», - деп айтылат.

Ал эми Сапар Исаков аны камакка алууга эч кандай негиз жок экенин айткан эле. Ал буга чейин 2018-жылдын 26-апрелинде, 14-майда жана 29-майда суракка чакырылган.

-----------------------------------------------------------------------------------------------------

Ошондой эле кечээ, 5-июнда Бишкектин Биринчи май райондук соту мурунку мэр Кубанычбек Кулматовдун баш коргоо чарасын өзгөрттү. Ага ылайык, К.Кулматов 28-июнга чейин УКМКнын тергөө абагында камакта болот.

Буга чейин анын мүлкү камакка алынган болчу. УКМКнын маалыматы боюнча, мурунку мэр кытайлык компания тарабынан Кыргызстандын аймактарындагы 2 мектептин курулушуна бөлүнгөн 2 млн доллар каражаттын мыйзамсыз пайдаланылышы боюнча айыпталып жатат.
Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
×